Od marta ove godine, treća generacija Apple TV uređaja više neće biti podržana od strane YouTube aplikacije. Korisnici koji i dalje upotrebljavaju ove uređaje moći će i dalje da gledaju YouTube sadržaj, ali samo ako ga cast-uju sa nekog drugog uređaja, dok direktan pristup sa ovog set-top-box-a neće više raditi.
Ovo je odluka YouTube-a, a ne Apple-a. Iz YouTube-a su objavili da žele da svojim korisnicima pruže samo najbolje iskustvo gledanja video sadržaja i da je to razlog zašto su napravili izmjene u listi podržanih uređaja. Iz liste je izbačena samo treća generacija Apple TV-a, dok će YouTube aplikacija i dalje normalno raditi na novijim verzijama ovih uređaja. Korisnici koji imaju Apple TV 4K ili Apple TV HD, kao i korisnici iPhone i iPad uređaja i dalje će normalno pristupati YouTube-u. A korisnici koji ostanu bez ove aplikacije, moći će da sa svojih iOS uređaja, preko AirPlay-a, stream-uju YouTube na Apple TV.
S obzirom na to koliko je tehnologija napredovala od kada je predstavljen Apple TV treće generacije, možda je vlasnicima ovih uređaja ipak pametnije da nabave neku od novijih verzija Apple TV-a.
Izvor: Gizmodo